एका १७ वर्षीय युवतीने राहत्या घरात फॅनला ओढणीच्या सहाय्याने गळफास घेऊन आत्महत्या केल्याची घटना रविवारी (दि.१९) दुपारी ३.५५ वाजेच्या पूर्वी नागरदेवळे (ता. नगर) येथे घडली. पायल भाऊसाहेब साबळे (वय १७, रा. लक्ष्मीनगर, नागरदेवळे) असे आत्महत्या केलेल्या अल्पवयीन मुलीचे नाव आहे. दरम्यान, तिने आत्महत्या का केली याबाबतची माहिती समजू शकली नाही.
याप्रकरणी भिंगार कॅम्प पोलीस ठाण्यात आकस्मात मृत्यूची नोंद करण्यात आली आहे. पायल साबळे रविवारी दुपारी घरी असताना तिने घरातील फॅनला ओढणीच्या सहाय्याने गळफास घेतला. सदरचा प्रकार ३.५५ वाजेच्या सुमारास नातेवाईकांच्या निदर्शनास आला. तिचे वडील भाऊसाहेब दत्तु साबळे यांनी तिला उपचारासाठी येथील जिल्हा शासकीय रूग्णालयात दाखल केले. दरम्यान, तेथील डॉक्टरांनी तिला उपचारापूर्वीच मयत घोषित केले.
याबाबतची खबर जिल्हा रूग्णालयातील पोलिसांनी भिंगार कॅम्प पोलिसांना दिली. घटनेची माहिती मिळताच भिंगार कॅम्प पोलीस ठाण्याचे सहाय्यक पोलीस निरीक्षक दिनकर मुंडे, पोलीस उपनिरीक्षक मनोज महाजन यांनी पथकासह घटनास्थळी भेट देत पंचनामा केला. दरम्यान, पायल साबळे हिने आत्महत्या का केली याबाबतचे कारण समजू शकले नाही. यासंदर्भात अधिक माहिती पोलिसांकडून घेतली जात आहे. पोलीस अंमलदार विधाते अधिक तपास करीत आहेत.
