राज्यसह देशातील धनगर समाजाचे उर्जा केंद्र असलेल्या पुण्यश्लोक अहिल्याबाई होळकर जन्मगाव चौंडी (ता.जामखेड) येथील जयंतीसाठी 50 लाख रुपयांच्या निधीस राज्य सरकारने मंजुरी दिली आहे.
या संदर्भात पुण्यश्लोक अहिल्याबाई होळकर यांच्या माहेरचे नववे वंशज आ. राम शिंदे यांनी 3 एप्रिलला दिलेल्या पत्रानुसार व आ.गोपीचंद पडळकर यांनी 4 एप्रिल रोजी दिलेल्या पत्रानुसार जिल्हा वार्षिक योजना सर्वसाधारणमधून निधी उपलब्ध होणार आहे. याबाबतचे आदेश राज्य शासनाचे उपसचिव स. हा. धुरी यांनी काढले असून पुण्यश्लोक अहिल्याबाई होळकर यांची जयंती साजरी करण्यासाठी जिल्हा वार्षिक योजना (सर्वसाधारण) 2023-24 अंतर्गतच्या इतर जिल्हा योजनेतून एकवेळचे विशेष बाब म्हणून 50 लाख रुपये इतका निधी इतर योजनांच्या बचतीतून उपलब्ध करुन देण्यास शासन मान्यता देत असल्याचे पत्रात नमूद करण्यात आले आहे. पुण्यश्लोक अहिल्याबाई होळकर यांची जयंती 31 मे रोजी चौंडी येथे साजरा होणार असून सरकारच्या या निर्णयामुळे राज्यातील अहिल्याप्रेमींमध्ये समाधानाचे वातावरण पसरले आहे.
