अहमदनगर -पुतण्याने चुलत्यावर कोयत्याने हल्ला केल्याची घटना सोमवारी (दि. 2) सकाळी 11 वाजेच्या सुमारास नालेगाव भागातील शिव पवन मंगल कार्यालयाच्यापाठीमागे घडली. हरिष भीमराव वाघचौरे (वय 47 रा. शिव पवन मंगल कार्यालयाच्या पाठीमागे, नालेगाव) असे जखमी चुलत्याचे नाव आहे.
त्यांनी तोफखाना पोलीस ठाण्यात दिलेल्या फिर्यादीवरून पुतण्या सिध्दांत चंद्रकांत वाघचौरे (रा. शिव पवन मंगल कार्यालयाचे पाठीमागे, नालेगाव) याच्या विरोधात गुन्हा दाखल करण्यात आला आहे. सोमवारी सकाळी 11 वाजता फिर्यादी त्यांच्या घराच्या भिंतीला पाईपलाईनचे काम करत असताना पुतण्या सिध्दांत त्याच्या पत्नीला मारहाण करून घराच्या बाहेर आला.
त्याने फिर्यादीची आई साखराबाई भीमराव वाघचौरे यांना लाथाबुक्क्यांनी मारहाण केली. त्याच्या हातात कोयता होता. कोयत्याने फिर्यादीवर हल्ला करून त्यांना जखमी केले. जखमी फिर्यादी यांनी जिल्हा रुग्णालयात उपचार घेतल्यानंतर तोफखाना पोलीस ठाण्यात गुन्हा दाखल केला आहे. पोलीस अधिक तपास करीत आहेत.
