बीडच्या मस्साजोगचे सरपंच संतोष देशमुख यांच्या हत्येनंतर राज्यातलं राजकीय आणि सामाजिक वातावरण ढवळून निघालं आहे. राजकीय नेत्यांसह समाजिक कार्यकर्त्यांनी या हत्येतील आरोपींचा धनंजय मुंडे यांच्याशी कथित संबंध असल्याचा आरोप करत, मुंडे यांनी कॅबिनेट मंत्रिपदाचा राजीनामा द्यावा अशी मागणी केली आहे. तसंच सुरेश धस यांनीही सातत्याने या प्रकरणाचा पाठपुरावा केला आहे. दरम्यान सुरेश धस यांनी बडी मुन्नी असा एक उल्लेख केला होता. त्याबाबत अजित पवार यांना विचारलं असता त्यांनी उत्तर दिलं आहे.
सुरेश धस यांनी असा उल्लेख केला होता की, राष्ट्रवादीत मुन्नी आहे. राष्ट्रवादीत एक वरिष्ठ मुन्नी आहे. राष्ट्रवादीत एक बडी मुन्नी आहे आणि त्या मुन्नीला म्हणा तू इथे ये. मिटकरी, सुरज चव्हाण या लहान पोरांना बोलायला लावते. मला माहिती आहे आणि मुन्नीला माहिती आहे, मी कोणाबद्दल बोलत आहे. सुरेश धसांच्या या विधानानंतर विविध चर्चा रंगताना दिसल्या. आता सुरेश धस यांच्या या मुन्नीच्या विधानावर अजित पवार हे चांगलेच संतापले.
सुरेश धस यांनी बडी मुन्नीचा उल्लेख केला, बडी मुन्नी कोण? असं विचारताच अजित पवार म्हणाले, “बडी मुन्नी कोण हे सुरेश धस यांनाच विचारा. कुणी फाल्तू गोष्टी बोलत असेल तर मी स्पष्ट नावं घेऊन बोलणारा आहे. त्यामुळे त्याला (सुरेश धस) विचारा तो कुणाबद्दल बोलतो आहे.” अशी प्रतिक्रिया अजित पवार यांनी दिली आहे.
