अहमदनगर- एका लग्नाची भलतीच गोष्ट समोर आली आहे. ऐन लग्नात जे घडलं त्यानंतर लग्नमंडपात एकच गोंधळ उडाला. एका मंगल कार्यालयात एक लग्नसमारंभ सुरु होता. लग्नघटिका जवळ आली होती. वधू-वर एकमेकांच्या गळ्यात हार घालण्याच्या तयारीत असतानाच अचानक नवरदेवाची पहिली पत्नी मंडपात हजर झाली. यानंतर नवरदेवाची वरात थेट पोलीस ठाण्यात गेली. याप्रकरणी तोफखाना पोलीस ठाण्यात नवरदेवाविरोधात गुन्हा दाखल करण्यात आला आहे. विशाल पवार असे आरोपी नवरदेवाचे नाव आहे. विशाल हा पहिल्या पत्नीला घटस्फोट न देताच दुसरा विवाह करत होता
विशाल पवार याचे आधीच लग्न झाले असून त्याला एक मुलगाही आहे. पहिल्या पत्नीला घटस्फोट न देताच विशाल दुसरा विवाह करत होता. दुसऱ्या मुलीबरोबर उपनिबंधक कार्यालयात विवाह करून नंतर एका हॉटेलमध्ये लग्न सोहळ्याचे आयोजन केले होते. पतीच्या दुसऱ्या विवाहाची माहिती छत्रपती संभाजी नगरमध्ये राहणाऱ्या पत्नीला कळली. पत्नीने तात्काळ आई-वडील आणि इतर नातेवाईकांसह नगर गाठले.
नगरमधील मंगल कार्यालयाचा पत्ता शोधला आणि लग्न लागायच्या आत पत्नी लग्नमंडपात हजर झाली. लग्नमंडपात पहिल्या चांगलाच राडा केला. महिलेने आधी नियोजित वधूला चोप दिला. अचानक घडलेल्या या घटनेने नववधूसह नातेवाईकही गोंधळून गेले. वऱ्हाड्यांपैकी कुणीतरी पोलिसांना याची माहिती दिली. माहिती मिळताच पोलीस तात्काळ मंगलकार्यात हजर झाले आणि लग्नाची वरात थेट पोलीस ठाण्यात नेली.
पहिल्या पत्नीच्या फिर्यादीवरुन तोफखाना पोलीस ठाण्यात विशाल पवार याच्याविरोधात कलम 494 अन्वये गुन्हा दाखल केला आहे. आरोपी विशाल हा जालना जिल्ह्यातील रहिवासी आहे, तर त्याची नियोजीत वधू छत्रपती संभाजी नगरमधील रहिवासी आहे.
