श्रीक्षेत्र मढी देवस्थानच्या विश्वस्तांमध्ये अध्यक्ष बदलाच्या मुद्द्यावरून राडा जबरदस्त झाला. अध्यक्ष बदलावरून बोलावण्यात आलेल्या बैठकीदरम्यान विश्वस्तांमध्ये लाठ्या-काठ्यांनी हाणामारी झाली. या हाणामारीमध्ये गावातील तरुणांनी सहभाग होता. यामुळे विश्वस्तांसह काही तरुण देखील जखमी झाले आहेत. दरम्यान या घटनेमध्ये अध्यक्ष संजय मरकड यांना जबरदस्त मारहाण झाली असून त्यांना पुढील उपचारासाठी नगर येथे हलवण्यात आले आहे. या प्रकारामुळे नगर जिल्ह्यात एकच खळबळ उडाली आहे.
ही घटना गुरुवारी सकाळी 11.30 वाजेच्या सुमारास घडली. घटनेनंतर जखमींना पाथर्डी उपजिल्हा रुग्णालयात दाखल करण्यात आले आहे.
श्रीक्षेत्र मढी देवस्थानच्या अध्यक्षपदावरून दोन गटात मागील काही दिवसांपासून धूसफूस सुरू होती. यामुळे आज गुरुवार दि. 14 डिसेंबर रोजी सकाळी 10.30 वाजेच्या दरम्यान देवस्थानच्या सभागृहात विश्वस्तांनी बैठकीचे आयोजन करण्यात आले होते.या बैठकीत बहुमताने अध्यक्ष बदलाबाबत निर्णय घेण्यात येणार होता. अध्यक्ष बदलाची चर्चा सुरू असतानाच तेथे दोन गटात राडा झाला. विश्वस्तांमध्ये बाचाबाची सुरू असताना काही स्थानिक तरुण मध्ये पडले. अखेर बाचाबाचीचं रुपांतर लाठ्या-काठ्यांनी हाणामारी करेपर्यंत झालं.
दोन गटात सुरू झालेल्या हाणामारीने उपस्थितांमध्ये एकच धांदल उडाली. दोन्ही गटाने एकमेकांना मारहाण केल्याने यामध्ये काहीजण जखमी झाले. या सर्व जखमींना पाथर्डी ग्रामीण रुग्णालयात दाखल करण्यात आले आहे.
यावेळी पाथर्डी ग्रामीण रुग्णालय व पोलीस ठाण्याच्या परिसरात मोठी गर्दी झाली होती. जखमींवर उपचार सुरू असून पाथर्डी पोलिसात गुन्हा दाखल करण्याची प्रक्रिया सुरू करण्यात आली आहे.
