काँग्रेस नेते अशोक चव्हाण आणि उपमुख्यमंत्री देवेंद्र फडणवीस एकमेकांना भेटल्याची माहिती उघड झाली आहे. हे दोन्ही नेते भाजपच्या एका प्रवक्त्याच्या घरी भेटले. यावेळी दोन्ही नेत्यांमध्ये बंददाराआड चर्चाही झाल्याचं सांगितलं जातं. अशोक चव्हाण हे काँग्रेसमधून बाहेर पडणार असल्याची आधीही चर्चा होती. त्यानंतर आता हे दोन्ही नेते एकमेकांना भेटल्याने या चर्चांना अधिक उधाण आलं आहे. शिंदे सरकारच्या बहुमत चाचणीवेळी अशोक चव्हाणांसह चार ते पाच आमदार उशिराने सभागृहात पोहोचले होते. त्यावेळी देवेंद्र फडणवीस यांनी काही अदृश्य हात आमच्या पाठी असल्याचं सूचक विधान केलं होतं. फडणवीसांचं हे विधान आणि चव्हाण यांचं सभागृहात उशिरा पोहोचण्याचा त्यावेळी संबंधही लावला गेला होता. काँग्रेसचे माजी दोन नेते लवकरच शिंदे-फडणवीस सरकारच्या मंत्रिमंडळ विस्तारात शपथ घेणार असल्याची चर्चाही रंगली आहे.
