केंद्रीय मंत्री नारायण राणे यांचे सुपुत्र माजी खा.निलेश राणे यांनी राजकारणातून कायमचे दूर होण्याचा निर्णय घेतला आहे. विजयादशमीच्या मुहूर्तावर त्यांनी व्टिट करीत हा निर्णय जाहीर केला आहे. निलेश राणे हे माजी खासदार असून अलिकडेपर्यंत ते राजकारणात सक्रिय होते. मात्र आता त्यांनी राजकारणापासून कायमचे दूर जाण्याचे ठरविले आहे. राणे यांनी म्हटले आहे की,
नमस्कार,
मी सक्रिय राजकारणातून कायमचा बाजूला होत आहे, आता राजकरणात मन रमत नाही, इतर काही कारण नाही.
मागच्या १९/२० वर्षा मध्ये आपण सगळ्यांनी मला खूप प्रेम दिलं, कारण नसताना माझ्या सोबत राहिलात त्या बद्दल मी आपला खूप आभारी आहे. BJP मध्ये खूप प्रेम भेटलं आणि BJP सारख्या एका उत्तम संघटनेत काम करण्याची संधी मिळाली त्या बद्दल मी खूप नशीबवान आहे.
मी एक लहान माणूस आहे पण राजकरणात खूप काही शिकायला मिळालं आणि काही सहकारी कुटुंब म्हणून कायमचं मनात घर करून गेले, आयुष्यात त्यांचा मी नेहमी ऋणी राहीन. निवडणूक लढवणं वगैरे यात मला आता रस राहिला नाही, टीका करणारे टीका करतील पण जिथे मनाला पटत नाही तिथे वेळ स्वतःचा आणि इतरांचा वाया घालवणे मला पटत नाही. कळत नकळत मी काही लोकांना दुखावलं असेल त्याबद्दल मी दिलगिरी व्यक्त करतो.
तुम्हा सर्वांना माझ्या शुभेच्छा.
जय महाराष्ट्र!
