शिक्षक आमदार दराडे यांच्या समोरच शिक्षक, शिक्षकेतरांनी प्रश्‍नांचा व तक्रारींचा वाचला पाढा

शिक्षक दरबारात शिक्षक, शिक्षकेतरांनी प्रश्‍नांचा व तक्रारींचा वाचला पाढा
शाळांच्या विविध प्रश्‍नांवर शिक्षक आमदार दराडे आणि शिक्षण उपसंचालक अहिरे यांचे तातडीने कार्यवाही करण्याचे आदेश
स्वतंत्र्यपणे पार पडली प्राथमिक व माध्यमिकची बैठक; तक्रारी असलेल्या अधिकाऱ्यांची खरडपट्टी
अहमदनगर (प्रतिनिधी)- जिल्ह्यातील प्राथमिक व माध्यमिक शाळांचे मुख्याध्यापक, शिक्षक व शिक्षकेतर कर्मचाऱ्यांचे प्रश्‍न सोडविण्यासाठी शहरात शिक्षण उपसंचालक (पुणे) राजेंद्र आहिरे यांच्या प्रमुख उपस्थितीत शिक्षक आमदार किशोर दराडे यांनी घेतलेल्या शिक्षक दरबारमध्ये शिक्षक, शिक्षकेतरांचे विविध प्रश्‍न सोडविण्याचे शिक्षण विभागाच्या अधिकाऱ्यांना आदेश देण्यात आले. तर शिक्षक, शिक्षकेतरांनी मांडलेल्या विविध प्रश्‍नांवर तातडीने कार्यवाही करण्याच्या सूचना करण्यात आल्या. प्राथमिक व माध्यमिक विभागाची स्वतंत्र बैठक घेऊन विविध विषयांवर चर्चा करण्यात आली.
या बैठकीसाठी माध्यमिकचे शिक्षणाधिकारी अशोक कडूस, प्राथमिकचे शिक्षणाधिकारी भास्कर पाटील, वेतन पथक अधीक्षक (माध्यमिक) रामदास म्हस्के, वेतन पथक अधीक्षक (प्राथमिक) हेमंत साळुंखे, उपशिक्षणाधिकारी आकाश दरेकर, संध्या भोर, बाळासाहेब धनवे, जळगावचे शिक्षक नेते संभाजी आप्पा पाटील, नाशिक मुख्याध्यापक संघाचे अध्यक्ष एस.बी. देशमुख, भाऊसाहेब रोहोकले, मिथून डोंगरे, संभाजी पवार, ज्ञानदेव बेरड, बंडू मखरे, आप्पासाहेब शिंदे, बाबासाहेब बोडखे, वैभव सांगळे, महेंद्र हिंगे, अशोक आव्हाड, राजेंद्र डमाळे, रविंद्र देवडे, पोपट बोडखे, क्रीडा संघटनेचे राजेंद्र कोतकर, नंदकुमार शितोळे, देवीदास पालवे, घनश्‍याम सानप, शिरीष टेकाडे, रमजान हवालदार, सुनिल दानवे, दिलीप काटे, भास्करराव सांगळे, बापूसाहेब तांबे, राजेंद्र निमसे, रोहोकले गुरुजी, विठ्ठल उरमुडे, शेखर उंडे, अन्सार सय्यद, समीर पठाण, शिक्षकेतर संघटनेचे भानुदास दळवी, भारत दळवी, गोवर्धन पांडुळे आदींसह प्राथमिक, माध्यमिक शिक्षक, मुख्याध्यापक व शिक्षकेतर संघटनेचे प्रतिनिधींसह प्रश्‍न घेऊन आलेले शिक्षक व शिक्षकेतर वर्ग मोठ्या संख्येने उपस्थित होते.
बुरुडगाव रोड येथील रयत शिक्षण संस्थेचे उत्तर विभागीय कार्यालयात दुपारी 1 वाजता प्राथमिक विभागाच्या बैठकीला प्रारंभ झाले. प्रारंभी उपस्थितांच्या हस्ते कर्मवीर भाऊराव पाटील यांच्या प्रतिमेस पुष्पहार अर्पण करुन अभिवादन करण्यात आले. प्राथमिकच्या बैठकीत शालेय पोषण आहारात वाढविण्यात आलेले मेनू, वेळेवर पोषण आहाराचे न मिळणारे साहित्य व निकृष्ट दर्जा आणि कमी प्रमाणात मिळत असलेल्या अन्न-धान्याबाबत तक्रारी शिक्षकांनी केल्या. यावर शिक्षण उपसंचालक आहिरे यांनी प्रत्यक्ष भेटी देऊन तपासणी करण्याचे सूचना केल्या. तसेच गटशिक्षणाधिकारी यांच्यावर असलेल्या विविध आरोपांचा मुद्दा बैठकीत चांगलाच गाजला. शिक्षक आमदार दराडे यांनी त्यांची खरडपट्टी करुन चूकीच्या पध्दतीने सुरु असलेले कार्य व शिक्षकांच्या तक्रारीवर त्यांना खडेबोल सुनावले. तर प्राथमिक विभागातील गटशिक्षणाधिकारी व इतर संबंधित अधिकारी यांना माध्यमिक शाळांना भेटी देण्याचा अधिकार नसल्याचा खुलासा केला.
खाजगी प्राथमिक शाळांचे मागील सर्व पेंडींग स्वमान्यता प्रस्ताव कॅम्प लावून वितरित केले जाणार आहे. वरिष्ठ व निवड श्रेणी मंजूर झालेल्या शिक्षकांची फरक बिले आणि वैद्यकीय बिले वेतन पथक कार्यालयाकडून निधी उपलब्ध झाल्याबरोबर पारित करण्याचे सूचना यावेळी देण्यात आल्या. पीएफचे पावत्या मिळणे, नवभारत साक्षरता अभियान राबवण्यासाठी दिली जाणारी दमबाजी, मेडिकल बील, टप्पा अनुदान या प्रश्‍नावर चर्चा करुन सदर प्रश्‍न सोडविण्याचे आश्‍वासन देण्यात आले.
या बैठकीनंतर माध्यमिक विभागाची दुसरी बैठक पार पाडली. या बैठकीत दुसऱ्यांदा शिक्षक आमदार म्हणून निवडून आल्याबद्दल दराडे यांचा जिल्ह्यातील मुख्याध्यापक, शिक्षक व शिक्षकेतर समन्वय समितीच्या वतीने सत्कार करण्यात आला. या बैठकीत शालार्थ आयडी, शिक्षकेतर, ग्रंथपाल यांच्या प्रश्‍नासह एजंटगिरीचा गंभीर प्रश्‍न उपस्थित करण्यात आला. आमदार दराडे यांनी पैश्‍यासाठी शिक्षकांना वेठीस धरणे हा गंभीर प्रकार असून, यासंदर्भात चौकशी करण्याच्या सूचना केल्या.
वैयक्तिक, अर्धवेळ व निवडश्रेणी मान्यता, उपसंचालक स्तरावरील प्रलंबित वैद्यकीय देयके, संचमान्यता, अनुकंपा तत्वावरील मान्यता, इयत्ता 10 वी व 12 वी बोर्डाच्या परीक्षेत शिक्षकांवर होणारे प्राणघातक हल्ले, सेवापूर्ती दाखले, फरक बिले, मेडिकल बिले, डीसीपीएस, एनपीएस व पीएफ च्या पावत्या मिळण्यासह विविध प्रश्‍नांवर चर्चा रंगली होती.
आई-वडिलांच्या निधनानंतर उपासमारीची वेळ आलेली असताना अनुकंपावर शिपाई पदासाठी खडांबे विद्यालयात रुजू होण्यासाठी मंजूरी दिली जात नसल्याचा युवकाने अशरक्ष: सर्वांसमोर हंबरडा फोडून प्रश्‍न मांडला. सदर युवकाला आमदार दराडे यांनी धीर देत, हा प्रश्‍न तातडीने निकाली काढण्याच्या सूचना केल्या. यावर शिक्षणाधिकारी कडूस यांनी येत्या आठ दिवसात अनुकंपाच्या शिपाई पदासाठी मान्यता देण्याचे आश्‍वासन दिले. विविध प्रश्‍नांवर अधिकाऱ्यांसमोर प्रश्‍नांची उत्तरे घेऊन त्यावर तोडगा काढत दराडे यांनी अनेक प्रश्‍न या शिक्षक दरबाराच्या माध्यमातून निकाली काढले. दुपारी सुरु झालेला शिक्षक दरबार संध्याकाळी सहा वाजेपर्यंत सुरु होता. विविध प्रश्‍न सुटल्याने उपस्थित शिक्षक, शिक्षकेतर वर्गाने समाधान व्यक्त केले.
–
शिक्षक, शिक्षकेतरांचे प्रश्‍न प्रामुख्याने मार्गी लागावे या प्रामाणिक हेतूने शिक्षक दरबार घेण्यात येत आहे. कोणत्याही अधिकारी वर्गाला वेठीस धरण्याचा उद्देश नाही. फरक बिल, मेडिकल बिल टॅप ओपन झाल्यावर मिळणार आहे. लहान-मोठे प्रश्‍न या बैठकीच्या माध्यमातून सोडविण्यात येत आहे. शालार्थ आयडीसाठी शिक्षण संचालकांसह पुणे येथे शिक्षक दरबार घेतला जाणार आहे. शासन पातळीवरच्या विषयांवर अधिवेशनात प्रश्‍न मांडून ते देखील निकाली काढून शिक्षकांना न्याय देण्याचा प्रयत्न केला जाणार आहे. -किशोर दराडे (नाशिक विभाग, शिक्षक आमदार)
–
शिक्षक दरबारात न्याय मिळण्यासाठी आसुसलेले व ज्वलंत प्रश्‍नांनी रडणारे चहेरे प्रश्‍न सुटल्यानंतर हसताना बाहेर पडले. हेच खरी कामाची पावती आहे. पोटतिडकीने शिक्षक, शिक्षकेतरांचे प्रश्‍न सोडविण्याचे काम आमदार दराडे करत आहे. -आप्पासाहेब शिंदे (अध्यक्ष, माध्यमिक शिक्षक संघ)
–—
डीसीपीएस व एनपीएस खातेधारक शिक्षकांच्या खात्यावर लवकरच पैसे वर्ग करण्याचा दिलासादायक निर्णय घेण्यात आलेला आहे. पीएफच्या पावत्या मिळण्याचा मार्ग देखील मोकळा झालेला आहे. शिक्षण विभागातील कारभार पारदर्शीपणे होण्यासाठी शिक्षक आमदार दराडे महत्त्वाची भूमिका बजावत आहे. -वैभव सांगळे (समन्वयक, जुनी पेन्शन संघटना)