‘बस बाई बस’ कार्यक्रमात विचारण्यात आलेल्या प्रश्नांना किशोरी पेडणेकरांनी अगदी दिलखुलास आणि मजेशीर पद्धतीने उत्तरं देताना दिसल्या. प्रश्न विचारण्याबरोबरच या कार्यक्रमात मनोरंजनात्मक खेळही सहभागी महिलेसह खेळले जातात. यातीलच एक गमतीशीर खेळ म्हणजे गाण्याचे बोल ऐकून समोर कोणाचा चेहरा येतो ते मंचावरील स्त्रीला सांगायचे असते.किशोरी पेडणेकरांनाही काही गाणी ऐकवली गेली. यापैकी ‘कोण होतीस तू, काय झालीस तू, अगं वेडे कशी वाया गेलीस तू’ हे गाण्याचे बोल ऐकल्यानंतर कोण आठवतं, असं सुबोध भावेने त्यांना विचारलं. हे गाणं ऐकताच भाजपाच्या चित्रा वाघ यांचा चेहरा डोळ्यासमोर आल्याचं किशोरी पेडणेकरांनी उत्तर दिलं. किशोरी पेडणेकरांना पुढे ‘दोस्त दोस्त ना रहा’ हे गाणंही ऐकवण्यात आलं. हे गाणं ऐकताच त्यांनी उपमुख्यमंत्री देवेंद्र फडणवीस आठवल्याचे सांगितल्यावर एकच हशा पिकला. या कार्यक्रमातील काही व्हिडीओ क्लिप्स झी मराठीने त्यांच्या इन्स्टाग्राम अकाऊंटवरून शेअर केल्या आहेत.
