अहमदनगर-एसटीबस आणि मोटारसायकल यांची समोरासमोर धडक होऊन झालेल्या अपघातामध्ये मोटार सायकलस्वार माजी सैनिक जागीच ठार झाल्याची घटना आज दुपारी तीन वाजण्याच्या सुमारास अहमदनगर – पाथर्डी रस्त्यावरील करंजी गावाजवळ घडली. भारत लक्ष्मण पागिरे (रा. आगडगाव, ता. नगर) असे या अपघातात ठार झालेल्या युवकाचे नाव आहे.
या अपघातामध्ये बुलेट गाडीचा अक्षरश: चक्काचूर झाला होता. पोलिसांनी दिलेल्या माहितीनुसार, आज दुपारी भारत पागिरे हे करंजी येथून कासारवाडी, कासार पिंपळगाव येथे नातेवाईकाकडे गेले होते. तेथून परत करंजीकडे येत असताना करंजी गावाजवळील अपूर्व पेट्रोलपंपासमोर भिवंडी गेवराई या गेवराई डेपोच्या एसटी बसची आणि पागिरे यांच्या मोटरसायकलची समोरासमोर धडक झाली. या अपघातामध्ये पागिरे यांचा जागीच मृत्यू झाला. घटना घडल्यानंतर एसटी बस चालक तिथून पसार झाला.
अपघाताची माहिती समजल्यानंतर महामार्ग पोलीस पथक तसेच करंजी आऊट पोस्टचे हवालदार हरिभाऊ दळवी, लाड घटनास्थळी दाखल झाले व पागिरे यांचा मृतदेह शवविच्छेदनासाठी पाथर्डीला रवाना करण्यात आला. मयत भारत पागिरे माजी सैनिक असून ते दगडवाडी गावचे जावई असल्याची देखील माहिती समजली आहे.
माजी सैनिकाचा अपघात झाल्यानंतर त्यांच्या बुलेट गाडीचा व शरीराचा अक्षरश: चेंदामेंदा झाला होता. एवढी गंभीर घटना घडलेली असताना देखील या मृत बॉडीचे मोबाईलमध्ये फोटो काढून ते सोशल मीडियावर व्हायरल करण्यासाठी प्रत्येकाची घाई झालेली दिसून येत होती. अर्धा तास रस्त्याच्याकडेला पडलेल्या या मृतदेहावर कोणीही कपडा टाकण्याची देखील माणुसकी दाखवली नाही.
