अहमदनगर-राहुरी तालुक्यातील मानोरी येथील सेवानिवृत्त शिक्षकाच्या आत्महत्या प्रकरणी त्यांच्या सुनेसह तिचा प्रियकर आणि सुनेच्या नातेवाईकांविरोधात राहुरी पोलीस ठाण्यामध्ये आत्महत्येस प्रवृत्त केल्याचा गुन्हा दाखल करण्यात आला आहे. वेळोवेळी होणार्‍या त्रासास कंटाळूनच बरबडे यांनी हे पाऊल उचलल्याची महिती समोर आली आहे.
मानोरी परीसरात दि. 22 ऑगस्ट रोजी पहाटेच्या दरम्यान 65 वर्षीय सेवानिवृत्त शिक्षक सोन्याबापू बाबुराव बरबडे यांनी आपल्या राहत्या घरासमोरील झाडाला गळफास घेऊन आत्महत्या केल्याची घटना घडली होती. सून, तिचा प्रियकर अन् सुनेच्या नातेवाईकांच्या जासास कंटाळूनच बरबडे यांनी आत्महत्या केल्याची फिर्याद राहुरी पोलीस ठाण्यात दाखल झाली आहे.
सोन्याबापू बरबडे यांचा मुलगा शिवाजी बरबडे हा व्यवसायानिमित्ताने पुण्यात राहत होता. त्याचा विवाह आरडगाव येथील ढेरे कुटुंबातील विशाखाशी झाला होता. विवाहानंतर काही दिवस त्यांचा सुखाचा संसार सुरू झाला. त्यातून त्यांना दोन मुली देखील आहेत. मात्र, गेल्या काही वर्षापासून पुण्यामध्ये त्यांच्या सुनेचे सूत तेथीलच विजयकुमार चव्हाण यांच्यासोबत जुळले. त्यानंतर आपल्या दोन मुलींना घेऊन सोन्या-चांदीचे दागिने व रोख रक्कम घेऊन ती विजयकुमार सोबत पळून गेली होती.
त्यानंतर तिने वेळोवेळी तिच्या पती व सासर्‍याला पैशाची मागणी करून त्रास देत होती. त्यात तिला तिच्या माहेरचे लोक व तिचा प्रियकर देखील मदत करत होता. घटस्फोटासाठी अर्ज करूनही विशाखा घटस्फोट देत नव्हती तर बरबडे यांना वारंवार फोन करून तुमच्या मुलाचा काटा काढून आम्ही तुमची सर्व संपत्ती हडप करणार आहोत. अशा प्रकारच्या वारंवार येणार्‍या धमक्यांना घाबरून बरबडे हे मानसिक तणावात होते. यातूनच त्यांनी आत्महत्या केली असून माझ्या मृत्यूस हेच लोक कारणीभूत असल्याचे देखील चिठ्ठीत नमूद केले आहे.
मयत सोन्याबापू बरबडे यांचा मुलगा शिवाजी सोन्याबापू बरबडे यांच्या फिर्यादीवरून आरोपी व्याही चंद्रभान राधाकृष्ण ढेरे, चुलत व्याही संजय राधाकृष्ण ढेरे, दोघे राहणार आरडगाव, ता. राहुरी. तसेच सून विशाखा शिवाजी बरबडे व तिचा प्रियकर विजयकुमार विलास चव्हाण दोघे राहणार कृष्णानगर, चिंचवड, पुणे या चार जणांवर राहुरी पोलिस ठाण्यात गु.र.नं. 949/2023 भादंवि कलम 306, 506, 34 प्रमाणे गुन्हा दाखल करण्यात आला आहे. पुढील तपास पोलीस उप निरीक्षक पोपटराव कटारे करत आहेत.
