मेलबर्न: लैंगिक शोषणाच्या आरोपात अडकलेल्या श्रीलंकेचा क्रिकेटपटू दनुष्का गुणथिलाका याला सर्व प्रकारच्या क्रिकेटमधून तातडीने निलंबित करण्यात आले आहे. श्रीलंका क्रिकेट बोर्डाने सोमवारी ही माहिती दिली. बोर्डाने दिलेल्या माहितीनुसार बोर्डाच्या कार्यकारी समितीने दनुष्काला निलंबित करण्याचा निर्णय घेतला आहे.
ऑस्ट्रेलियात सुरू असलेल्या आयसीसी टी-२० वर्ल्डकप दरम्यान लैंगिक शोषणाच्या आरोपाखाळी रविवारी ऑस्ट्रेलिया पोलिसांनी दनुष्काला अटक केली होती. श्रीलंकाचा संघ रविवारीच मायदेशी परतला होता. ऑस्ट्रेलिया पोलिसांनी दिलेल्या माहितीनुसार दनुष्काविरुद्ध एका २९ वर्षीय महिलेने तक्रार दाखल केली आहे. या दोघांची ओळख एका डेटिंग अॅपवर झाली होती. ऑस्ट्रेलिया पोलिसांनी केलेल्या या कारवाईनंतर श्रीलंका बोर्डाने दनुष्कावर निलंबनाची कारवाई केली आहे.
