राजधानी असलेल्या दिल्ली विधानसभा निवडणुकीचा आज निकाल लागणार आहे. दिल्लीमध्ये कोणाची सत्ता येाणार याकडे सर्वांचं लक्ष लागलेलं आहे. सुरुवातीच्या कौलमधील 42 जागांचे कल समोर आले आहेत. त्यात 15 जागांवर आप तर 26 जागांवर भाजप आघाडीवर आहेत. काँग्रेस एका जागेवर आघाडीवर दिसत आहे. कलामध्ये भाजपने मोठी आघाडी घेतली आहे. काँग्रेसचे अस्तित्व दिसत नाही. शीला दीक्षित यांच्यानंतर काँग्रेसचा दुष्काळ संपलेला नाही. त्यातच आपचे अनेक दिग्गज पिछाडीवर दिसत आहेत. मादीपूर विधानसभा मतदारसंघात आम आदमी पक्षाला जोरदार धक्का बसताना दिसत आहे, मादीपूरमधील आप उमेदवार राखी बिर्ला सुरुवातीच्या कलांमध्ये पिछाडीवर दिसत आहेत. पोस्टल मतमोजणीत भाजप आघाडीवर, तर आपचे तीन बडे नेते अरविंद केजरीवाल, अतिशी, मनीश सिसोदिया पिछाडीवर आहेत. दिल्ली विधानसभेच्या ७० जागांसाठी ५ फेब्रुवारीला मतदान झाले होते. देशाच्या राजधानीत भाजपचे कमबॅक होणार, असा दावा एक्झिट पोलने केला आहे. तर आप सुद्धा मोठी मुसंडी मारण्याचा दावा करण्यात येत आहे. दुसरीकडे काँग्रेसला निदान एक तरी जागा निवडून आणता येईल की नाही, हे आज स्पष्ट होईल. त्यानंतर काँग्रेसच्या नेतृत्वातील INDIA आघाडीत त्याचे पडसाद उमटल्याशिवाय राहणार नाही. दिल्लीत कमळ फुलताना दिसत आहे. भाजप 27 वर्षानंतर पुन्हा जोरदार कमबॅक करताना दिसत आहे. दिल्लीत भाजपचे कमळ फुलल्यास हा मैलाचा दगड ठरणार आहे. भाजपचा झंझावत थांबवण्यासाठी इंडिया आघाडी अपयशी ठरत असल्याचे यावरून दिसून येते. डीव्ही रिसर्च करून जारी करण्यात आलेल्या एक्झिट पोलनुसार दिल्लीमध्ये भाजपच्या पारड्यात मतं टाकले आहे. दिल्लीमध्ये भाजपला 40 ते 44 जागा मिळण्याची शक्यता वर्तवण्यात आली आहे. तर अरविंद केजरीवाल यांच्या आपला 25 ते 29 जागेचा कौल देण्यात आला आहे.
