भारताचा माजी क्रिकेटपटू वीरेंद्र सेहवागच्या भावाला चंदीगड पोलिसांनी अटक केली आहे. वीरेंद्र सेहवागचा भाऊ विनोद सेहवागला चंदीगड पोलिसांच्या पीओ सेल टीमने अटक केली आहे.
वीरेंद्र सेहवाग यांचे भाऊ विनोद सेहवाग यांच्याविरुद्ध चंदीगड जिल्हा न्यायालयात ७ कोटी रुपयांचा चेक बाउन्सचा खटला सुरू आहे. बद्दी येथील कंपनी श्री नैना प्लास्टिकने दिल्ली येथील जालता फूड अँड बेव्हरेजेस आणि त्यांचे तीन संचालक विनोद सेहवाग, विष्णू मित्तल आणि सुधीर मल्होत्रा यांच्याविरुद्ध हा खटला दाखल केला आहे. गेल्या वर्षी, या प्रकरणात, कनिष्ठ न्यायालयाने विनोद सेहवाग यांच्यासह इतर संचालकांना आरोपी म्हणून न्यायालयात हजर राहण्याचे समन्स बजावले होते. पण आता त्यांनी न्यायालयाच्या समन्स आदेशाविरुद्ध सत्र न्यायालयात रिव्हिजन याचिका दाखल केली आहे.
श्री नैना प्लास्टिक कंपनीचे वकील विकास सागर यांनी सांगितले की, जालता कंपनीने त्यांच्या कंपनीला काही साहित्य पुरवण्याचे ऑर्डर दिल्या होत्या. या साहित्यांची किंमत अंदाजे ७ कोटी रुपये होती. त्यानंतर जाल्टा कंपनीने जून २०१८ मध्ये तक्रारदार कंपनीला प्रत्येकी १ कोटी रुपयांचे ७ बँक चेक दिले. परंतु तक्रारदार कंपनीने हे चेक खात्यात जमा केले तेव्हा निधीअभावी ते बाउन्स झाले. तक्रारदार कंपनीने याबद्दल जाल्टा कंपनीला कळवले. परंतु दोन महिन्यांनंतरही जेव्हा चेक मंजूर झाले नाहीत, तेव्हा कंपनी आणि संचालकांविरुद्ध कायदेशीर नोटीस बजावण्यात आली आणि १५ दिवसांच्या आत पैसे देण्याची मागणी करण्यात आली. मात्र कायदेशीर नोटीस देऊनही जेव्हा कंपनीने पैसे दिले नाहीत तेव्हा त्यांनी चेक बाउन्सचा खटला दाखल केला.
