संगमनेर तालुक्यातील घुलेवाडी गटाचे माजी जिल्हा परिषद सदस्य सिताराम राऊत यांना दोन महिलांनी घुलेवाडी ग्रामपंचायत कार्यालयासमोर शिवीगाळ करत त्यांना मारहाण केल्याची घटना घडली. जुन्या वादातून ही घटना घडली आहे. याप्रकरणी चौघांविरुद्ध संगमनेर शहर पोलीस ठाण्यात गुन्हा दाखल झाला आहे.
घुलेवाडी येथील कविता सुरेश अभंग व माजी जिल्हा परिषद सदस्य सिताराम राऊत हे शेजारी राहतात. त्यांच्यामध्ये सामुदायिक रस्त्यावरून नेहमीच वाद होत असतो. दि. 13 सप्टेंबर रोजी या दोन कुटुंबांमध्ये वाद झाले होते. त्यावेळी त्यांनी एकमेकांविरुद्ध संगमनेर शहर पोलीस ठाण्यामध्ये तक्रारी दाखल केल्या होत्या. काल सकाळी 11.30 वाजेच्या सुमारास राऊत हे तलाठी कार्यालयात कामानिमित्त त्यांच्या कारमधून (क्र. एम एच-17 बी एक्स-0643) गेले होते. या ठिकाणी त्यांचे मित्र भेटल्याने त्यांनी आपले वाहन थांबवले.
मित्रांसोबत चर्चा झाल्यानंतर थोडे पुढे गेले असता कविता संतोष अभंग, विद्या संतोष अभंग, प्रथमेश संतोष अभंग, भारत संभाजी भोसले हे त्यांच्या वाहनांमधून आले. राऊत यांच्या गाडीला आडवी गाडी लावली व ते सर्वजण खाली उतरले. कविता संतोष अभंग व विद्या संतोष अभंग या दोघींनी राऊत यांना गाडीतून खाली ओढले. विद्या अभंग हिने खाली पाडून शिवीगाळ करून मारहाण केली.
