बीड: मराठा आंदोलनाचे नेते मनोज जरांगे यांनी परभणी येथे झालेल्या मूक मोर्चात मंत्री धनंजय मुंडे यांच्याविरुद्ध एकेरी भाषेचा उल्लेख केला. तसेच, दोन समाजात तेढ निर्माण होईल असे चिथावणीखोर वक्तव्य केले होते, असा आरोप करण्यात आला आहे. मनोज जरांगे यांनी “मुंड्या फिंड्या, हरामखोर अवलादी” अशा प्रकारचे असंवैधानिक व गैर असे शब्दप्रयोग संवैधानिक पदावरील व्यक्तीबाबत वापरले होते. त्यामुळे बदनामीकारक वक्तव्य व सामाजिक तेढ निर्माण करण्याच्या उद्देशाच्या अनुषंगाने परळी पोलीस ठाण्यात मनोज जरांगे यांच्याविरुद्ध असंज्ञेय गुन्हा दाखल करण्यात आला आहे.
सकाळपासून परळी पोलीस ठाण्यासमोर शेकडोच्या संख्येने धनंजय मुंडे समर्थक जमा झाले होत. मनोज जरांगे यांच्या विरोधात जोरदार घोषणाबाजी करत पोलीस ठाण्यासमोरच या जमावाने ठिय्या धरला होता. जोपर्यंत गुन्हा दाखल होत नाही तोपर्यंत आम्ही उठणार नसल्याची आक्रमक भूमिका या शेकडो समर्थकांनी घेतली होती. त्यानंतर पोलीस प्रशासनाच्या वतीने तक्रार अर्ज घेत त्याबाबतची शहानिशा करण्यात आली. त्यानंतर अखेर तुकाराम बाबुराव आघाव यांच्या तक्रारीवरून मनोज जरांगे यांच्या विरुद्ध परळी पोलीस ठाण्यात भारतीय न्याय संहिता कलम १७४ अंतर्गत असंज्ञेय अपराध (एनसीआर) अशा प्रकारचा गुन्हा नोंदवण्यात आला आहे. पुढील तपास परळी पोलीस करीत आहेत.
