बीडच्या परळी येथील जवाहर शिक्षण संस्थेच्या निवडणूकीत भाजपच्या राष्ट्रीय सचिव पंकजा मुंडे यांची बिनविरोध निवड झाली आहे. या अगोदर राष्ट्रवादीचे नेते धनंजय मुंडे यांचीदेखील या शिक्षण संस्थेवर बिनविरोध सभासद म्हणून निवड झाली आहे. शिक्षण संस्थेच्या निवडणुकीमध्ये बहीण-भावांची दिलजमाई झाल्याचं स्पष्ट झाले आहे.
निवडणूक निर्णय अधिकाऱ्यांनी यासंदर्भात अधिकृत घोषणा केली आहे. या गटात उमेदवारी अर्ज दाखल केलेले सदाशिव आप्पा मुंडे यांचे नातेवाईक बालाजी गिते यांनी माघार घेतली आहे, यामुळे पंकजा मुंडे बिनविरोध निवडून आल्या आहेत.
गोपीनाथ मुंडे आणि पंकजा मुंडे यांचे गेल्या अनेक वर्षांपासून वर्चस्व असलेल्या जवाहर शिक्षण संस्था संचालक मंडळाच्या 34 जागांसाठी सध्या निवडणूक होत आहे. या निवडणुकीत पंकजा मुंडे यांनी हितचिंतक सभासद गटातून उमेदवारी दाखल केली होती. त्यांच्या विरोधात संस्थेचे सदाशिव आप्पा मुंडे यांचे भाचे बालाजी रामचंद्र गिते यांनी उमेदवारी अर्ज दाखल केला होता. आज अर्ज मागे घेण्याच्या शेवटच्या दिवशी बालाजी गिते यांनी आपली उमेदवारी मागे घेतला, त्यामुळे पंकजा मुंडे बिनविरोध विजयी झाल्या आहेत. यापूर्वी आश्रयदाता सभासद गटाची जागा बिनविरोध निवडून आल्याने आता 32 जागांसाठी निवडणूक होणार आहे.
