राष्ट्रवादी काँग्रेसमधील बंडखोरीमुळे राज्याचे राजकारण चांगलेच तापले आहे. मात्र, वरिष्ठ नेत्यांच्या राजकारणात खालच्या कार्यकर्त्यांची चांगलीच गोची झालीय. हीच गोष्ट तालुक्यातील एका राजकीय पक्षाच्या समर्थकाला काही पटली नाही. त्याचा सारा राग त्याने भर चौकात व्यक्त केला. तेही हातात थेट गोफण घेऊनच.. महाराष्ट्रातील राजकीय घडामोडी पचनी न पडल्याने एका राजकीय पक्षाच्या समर्थकाने मद्यधुंद अवस्थेत भर चौकात वाहनांवर गोफणीने वार करीत सुमारे अर्धा तास गोंधळ घातला.
अनेक वाहनांना अडवून चालकांना शिवीगाळ करीत त्याने हातातील पंचामध्ये दगड बांधून रस्त्याने येणाऱ्या-जाणाऱ्या वाहनांवर वार केले. ‘अन्य पक्षातील फुटीर नेत्यांना मंत्रीपदे का बहाल करता’, असा संतप्त सवाल भाजपला करीत या तरुणाने जोरदार गोंधळ घातला. हा तरुण दारूच्या नशेत असला, तरी त्याला गेल्या चार-पाच दिवसांपासून सुरू असलेले राजकीय संदर्भ व घडामोडी अचूक माहिती होत्या.
एका ट्रकच्या बोनेटवर दगडाचा फटका बसला, मात्र सुदैवाने मोठे नुकसान झाले नाही. मद्यपीचा अवतार पाहून इतर वाहनचालकांनी लांबच राहणे पसंत केले. त्यामुळे काही काळ चौक पूर्णपणे बंद झाल्यासारखे वातावरण झाले होते.
दरम्यान, हा सर्व प्रकार तेथे ड्युटीवर असणाऱ्या वाहतूक पोलीसाच्या लक्षात आला. परिस्थिती हाताबाहेर जाण्याची शक्यता लक्षात घेऊन पोलिसांनी मद्यपीला चौकातून बाजूला घेतले. त्याच्या हातातून गोफणीसारखा केलेला पंचा व त्यात बांधलेला दगड हिसकाहून घेतला. हा प्रकार पाहण्यासाठी बघ्यांची मोठी गर्दी झाली होती. रस्त्यावरील वाहनचालकांना मात्र या प्रकाराचा नाहक मनस्ताप सहन करावा लागला.
