मंगळवारी जिल्हा पोलिस अधिक्षक राकेश ओला यांच्या हस्ते ‘श्रीं’ची प्राणप्रतिष्ठापणा
नगर – शहराचे ग्रामदैवत असलेल्या माळीवाडा येथील श्री विशाल गणेश मंदिर येथे गणेशोत्सवानिमित्त विविध धार्मिक कार्यक्रमांचे आयोजन करण्यात आले आहे. श्री गणेश चतुर्थी दिनी दि. 19 सप्टेंबर 2023 रोजी सकाळी 10 वा. मंदिरात जिल्हा पोलिस अधिक्षक राकेश ओला व सौ.ओला यांच्या हस्ते ‘श्रीं’ची विधीवतपणे प्राणप्रतिष्ठापणा होईल. याचबरोबर 10 दिवस विविध धार्मिक कार्यक्रमांचे आयोजन करण्यात आले असल्याची माहिती देवस्थानचे अध्यक्ष अ‍ॅड.अभय आगरकर यांनी दिली.
मंगळवार दि.19सप्टेबर रोजी पहाटे महापुजा, प्राणप्रतिष्ठेच्यावेळी सकाळी 9 वा. ‘नाद’ ढोल पथकाची मानवंदना दिली जाईल. दि. 22 रोजी सायं. 4 वा. आय लव्ह महाराष्ट्र यांच्यावतीने महिलांसाठी होम मिनिस्टर कार्यक्रम. निवेदक आरजे प्रसन्ना. दि. 23 रोजी सायं. 4 वा. पुणे येथील मावळा ग्रुपच्यावतीने छत्रपती शिवाजी महाराज यांच्या काळातील मैदानी खेळाचे प्रात्यक्षिक सादर केली जातील. दि. 24 रोजी सकाळी 8.30 वा. महिलांचे सामुहिक अथर्वशीर्ष पठण व महाआरती होईल. दि. 24 ते 26 दरम्यान श्री गणेशयाग होणार आहे. त्याचे यजमान गोरक्ष कोंडीराम आंबेकर व परिवार राहणार आहे. याचे पौरोहित्य नाशिक येथील मुकुंदशास्त्री मुळे गुरुजी करणार आहेत. दि.27 रोजी सुर्योदयापासून ते सुर्यास्तापर्यंत अग्नीहोत्र कार्यक्रम होईल. दि.28 रोजी गणेश विसर्जन दिनी सकाळी 9 वा. जिल्हाधिकारी सिद्धाराम सालीमठ व सौ.सालीमठ यांच्या हस्ते उत्थापन पुजा करण्यात येऊन मिरवणुकीस प्रारंभ करण्यात येईल.
यावेळी अ‍ॅड.अभय आगरकर म्हणाले, गणेशोत्सवानिमित्त 10 दिवसात विविध धार्मिक कार्यक्रमांचे आयोजन करण्यात आले आहे. मंदिरावर आकर्षक विद्युत रोषणाई करण्यात आली आहे. भविकांच्या सोयी-सुविधांसाठी मंडप, पिण्याच्या पाण्याची व्यवस्था करण्यात आली असल्याचेही अ‍ॅड.आगरकर यांनी सांगितले.
गणेशोत्सव यशस्वीतेसाठी देवस्थानचे पुजारी संगमनाथ महाराज, उपाध्यक्ष पंडितराव खरपुडे, सचिव अशोकराव कानडे, विश्वस्त बापूसाहेब एकाडे, हरिभाऊ फुलसौंदर, रंगनाथ फुलसौंदर, ज्ञानेश्वर रासकर, पांडूरंग नन्नवरे, गजानन ससाणे, संजय चाफे, हरिश्चंद्र गिरमे, चंद्रकांत फुलारी, विजय कोथिंबीरे, प्रा.माणिकराव विधाते, नितिन पुंड आदिंसह श्री विशाल गणेश सेवा मंडळ व भक्तगण प्रयत्नशील आहेत.
