कोयत्याचा धाक दाखवून व मारहाण करून दोघा जणांना लुटणार्‍या टोळीतील एकाला कोतवाली पोलिसांनी जेरबंद केले आहे. अभिषेक विजय मोढवे (रा. अंबिका चौक, वाकोडी फाटा, सोलापुर रस्ता, नगर) असे त्याचे नाव आहे. त्याला न्यायालयाने चार दिवसाची पोलीस कोठडी सुनावली असून, गुन्ह्यातील इतर संशयित आरोपींचा शोध कोतवाली पोलिसांकडून सुरू आहे.
बुरूडगाव रस्त्यावरील नक्षत्र लॉन येथे 19 ऑगस्ट 2023 रोजी रात्री मालवाहू टेम्पो घेऊन जाणार्‍या दोघांना मारहाण करत लुटल्याची घटना घडली होती. चार जणांच्या टोळीने कोयत्याचा धाक दाखवून फिर्यादी यांच्याकडील 11 हजारांची रोख रक्कम चोरून नेली होती. या प्रकरणी कोतवाली पोलीस ठाण्यात दिलेल्या फिर्यादीवरून गुन्हा दाखल झाला होता. तपास सुरू असताना गुन्ह्यातील अभिषेक विजय मोढवे याचे नाव निष्पन्न झाले. कोतवाली पोलिसांनी त्याचा शोध घेऊन त्याला अटक केली आहे. त्याने गुन्ह्याची कबुली दिली आहे. पोलीस उपनिरीक्षक अश्विनी मोरे पुढील तपास करीत आहेत.
पोलीस निरीक्षक चंद्रशेखर यादव यांच्या मार्गदर्शनाखाली उपनिरीक्षक मोरे, पोलीस अंमलदार संदीप पितळे, तानाजी पवार, सत्यजीत शिंदे, दीपक रोहोकले यांनी ही कारवाई केली.
