मुंबई : शिवसेना आणि एकनाथ शिंदे गटात आता खऱ्या अर्थाने कायदेशीर लढाई सुरू झाली आहे. शिंदे यांच्या १२ समर्थक आमदारांना पक्षांतरबंदी कायद्याखाली अपात्र ठरवावे, अशी मागणी करणारी याचिका शिवसेनेच्या वतीने विधानसभा उपाध्यक्षांकडे गुरुवारी रात्री करण्यात आली.
पक्षाने बुधवारी बोलावलेल्या बैठकीस गैरहजर राहून शिस्तभंग केल्याबद्दल एकनाथ शिंदे, संदीपान भुमरे, भरत गोगावले यांच्यासह एकूण १२ आमदारांवर अपात्रतेची कारवाई करत त्यांची आमदारकी रद्द करावी, अशी मागणी करणारे पत्र शिवसेना विधिमंडळ गटनेते अजय चौधरी यांनी विधानसभेचे उपाध्यक्ष नरहरी झिरवळ यांना दिले आहे. आता त्यावर झिरवळ काय निर्णय घेतात आणि एकनाथ शिंदे गटाकडून काय उत्तर मिळते याकडे साऱ्यांचे लक्ष लागले आहे. एकनाथ शिंदे, तानाजी सावंत, प्रकाश सुर्वे, बालाजी किणीकर, अनिल बाबर, लता सोनवणे, यामिनी जाधव, संजय शिरसाट, भरत गोगावले, संदीपान भुमरे, महेश शिंदे, अब्दुल सत्तार या १२ आमदारांचे सदस्य रद्द करण्याची मागणी शिवसेनेने नरहरी झिरवळ यांच्याकडे केली आहे.
