बीडच्या मस्साजोग येथील सरपंच संतोष देशमुख यांच्या हत्येनंतर राजकीय वातावरण प्रचंड तापलं आहे. तसंच आरोप प्रत्यारोपांच्या फैरीही झाडल्या जात आहेत. दरम्यान या प्रकरणात ज्याचं नाव सर्वाधिक चर्चेत होतं तो वाल्मिक कराड पुणे सीआयडीला शरण आला आहे. ज्यानंतर विविध प्रतिक्रिया समोर येत आहेत. संतोष देशमुख यांच्या हत्याप्रकरणातल्या एकाही आरोपीला सोडणार नाही असं देवेंद्र फडणवीस यांनी म्हटलं आहे. दरम्यान सीआयडीचे अधिकारी सारंग आव्हाड यांनी वाल्मिक कराडच्या शरणागतीबाबत प्रतिक्रिया दिली आहे.
आज सकाळी सुमारे साडेबाराच्या दरम्यान केस पोलीस स्टेशन बीड जिल्ह्यातील केज या ठिकाणी एफआयआर नंबर ६३८/२०२४ मधील आरोपी वाल्मिक कराड हा स्वतःहून सीआयडी मुख्यालयात हजर झाला आहे. त्याला सीआयडी पुणे यांनी ताब्यात घेतलं असून त्याची थोडीफार चौकशी करुन त्याला बीडकडे रवाना करण्यात आले आहे. आरोपी वाल्मिक कराडच्या बरोबर आमच्या टीमसह बीडचे तपास अधिकारीही आहेत. बीड सीआयडी पथकाचे अनिल गुजर यांच्या ताब्यात देण्याकरता बंदोबस्तात बीडकडे रवाना करण्यात आलं असल्याचं सारंग आव्हाड यांनी सांगितलं. तसेच, पुढची तपासणी गुजर हेच करतील, असेही त्यांनी म्हटलं आहे. सीआयडीचे डीवायएसपी आहेत त्यांच्या ताब्यात फरार आरोपीला देण्यात आलं आहे असंही आव्हाड यांनी सांगितलं.
