राष्ट्रवादी काँग्रेसमध्ये उभी फूट पडल्यानंतर विधानसभेतील विरोधी पक्षनेतेपदावर काँग्रेसने दावा सांगितला आहे. ज्येष्ठ नेते शरद पवार यांनीही याबाबत सकारात्मक प्रतिक्रिया व्यक्त केली आहे. त्या पार्श्वभूमीवर येत्या १७ जुलैपासून सुरू होणाऱ्या पावसाळी अधिवेशनात विरोधी पक्षनेत्यांची निवड करण्याचे बैठकीत ठरले. सर्व दृष्टिकोनातून विचार केला तर विधानसभेतील काँग्रेसचे सध्याचे गटनेते बाळासाहेब थोरात किंवा वर्षा गायकवाड यांच्यासारख्या एखाद्या तरुण नेत्याकडे विरोधी पक्षनेतेपदाची जबाबदारी हायकमांड देईल, अशी शक्यता एका ज्येष्ठ नेत्याने वर्तविली.
