सांगलीत बंडखोरी करणारे काँग्रेस नेते विशाल पाटील यांना काँग्रेसमधून पाठिंबा मिळू लागलाय. काँग्रेसमधून निलंबित करण्यात आलेले बाळासाहेब थोरात यांचे भाचे आणि नाशिक पदवीधर मतदारसंघाचे आमदार सत्यजित तांबे यांनी विशाल पाटील यांना पाठिंबा दिलाय. यामुळे महाविकास आघाडीचा सांगलीमधील वाद अजून चिघळण्याची शक्यता आहे.
सत्यजित तांबे यांनी विशाल पाटील यांच्या समर्थनार्थ ट्विट ( X ) करत त्यांना लोकसभा निवडणुकीसाठी शुभेच्छा दिल्यात.. काँग्रेसमध्ये युवकांना संधी नाकारल्या जात असल्याचेच या ट्विटच्या माध्यमातून सत्यजित तांबे यांनी अधोरेखित केल्याचे बघायला मिळतेय.
विशाल दादा… ऑल द बेस्ट
विशाल पाटलांवर काय अन्याय झालाय, हे फक्त त्यांचा संघर्ष माहित असलेल्यांनाच ठाऊक आहे. त्यांना हे पाऊल का उचलावे लागले याचा विचार होणे गरजेचे आहे. राजकारणात कर्तृत्ववान युवक हवेत या मताचा मी कार्यकर्ता आहे.
वसंतदादा पाटलांचे ह्या महाराष्ट्रावर व आमच्या पिढीवर अनंत उपकार आहेत, विशेषतः त्यांनी केलेल्या शिक्षणाच्या क्रांतीमुळेच आज घराघरात डॉक्टर, इंजीनियर तयार होत आहेत.
विशालदादा हे वसंतदादांचा कामाचा वसा आणि वारसा पुढे घेऊन जाण्यात पूर्णपणे सक्षम आहेत. त्यामुळेच त्यांना संधी मिळणे आवश्यक आहे. अजूनही वेळ गेलेली नाही, विशालदादांना कुठेतरी संधी मिळायलाच हवी.
